زيزو في مهمة سرية

انا زيزو عمري 130 سنة ايوة انت مغلطش في الرقم حبيت احكي حكايتي يمكن حد

يعملي تمثال في رمسيس أو طلعت حرب أو حتى على ناصية شارعنا ومش لازم بالحجم

الطبيعي المهم يلا نبدأ لأني حاسس بكرشة نفس

*** الحارة ***

من وانا عيل صغير عرفت انك علشان تعيش لازم تعيش بذراعك علشان الكل يحترمك

لازم يكون نبوتك في ايدك واضرب المربوط يخاف السايب وده حصل بعد لما كلت علقة

حلفت بعدها اني مش هنضرب تاني ابدا

*** المدرسة ***

ـ اتلميت على شلة زي الفل علموني ازاي اشيل موس واعلم على أي حد

ـ انا كان نفسي اطلع ضابط فكنت بعمل كمين في المدرسة وتبقى أمه داعية عليه اللي

يوقع تحت ايدي بيتقلب مصروف ماشي ساندويتش ماشي زمزمية ماشي شراب حتى

ماشي

ـ بس للأسف انا سبت التعليم مش المود بتاعي

*** الشارع ***

ـ في مثل بيقول اللي أهله معرفوش يربوه الشارع يربيه يعني محدش ليه فضل عليا

ـ عملت قهوة برعي المقر بتاعي أي حد عايز أي حاجة يشرفني بس انا مش فاتحها

جمعية خيرية ولا سبيل أنا برده ليا مصاريفي

*** عملية البرص الساطع ***

قاعد على القهوة لا ليا ولا عليا لقيت عبده سبارس جاي وبيقولي الواد زغلول النتن

واخد منه 4 جنيه ونص ومش راضي يجبهم قلتله اقل من 35 قرش مش واخد قالي

ماشي رحت لزغلول قلتله الفلوس ياض قالي مفيش اديته بتاع 3 أو 4 غرز في وشه

علشان يطلع الفلوس بصراحة انا طمعت في الفلوس كلها رجعت لعبده قلتله أنا جبت

الفلوس مالكش عندي غير 35 قرش كلمه منه على كلمه مني رحت مخلص عليه

*** السجن ***

ـ المفروض إن السجن تهذيب وإصلاح بس الحقيقة انه مشروع تسمين مجرمين الواحد

يدخل مستوى اجرامه واحد على عشرة يطلع 11 على عشرة

ـ ويا سلام على العصابات اللي بتتكون جوه السجن غير اللي بتتكون بره خالص بتبقى

خبرة

*** الإنتخابات ***

ـ دخلوني سجن انفرادي فجأة وفجأة برضه دخل عليا برنس كبير أوي وقالي احنا

محتاجين خدماتك قلتله أنا عنيا للحكومة

ـ قالي الموضوع بسيط في واحد نازل الإنتخابات و عايزين نروقه

وهنطلعك من السجن قلتله قشطة ومن يومها وأنا بقيت برنس كبير في منطقتي

*** الخلاصة ***

ـ الفلوس تصنع المعجزات وتفتح الأبواب المغلقة وخصوصاً مع ولا بلاش

ـ اللي مع الحكومة ميقلقش بس يحاسب وهوا نايم لحسن يجيله كابوس يموت فيه

*** إعلان ***

نقبل التبرعات على حساب رقم خمسة أصفار تسع أصفار بنك السلف تلف والرد خسارة

وذلك لبناء مدرسة زيزو الدولية لتعليم أصول البلطجة عبر البحار.شاكرين حسن تعاونكم

ـــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

جميع الأحداث والشخصيات تمت للواقع بصلة بس غير مباشرة

ـــــــــــــــــــــــــــــــــــــــــــــــــــــــــــــــــــــــــــــــــــــــــــ

إيه رأيكم في أمل إن احنا يوم نعيش بدون الحاجة لوجود السجون

دواير...و دواير

مش عارف ليه حاسس ان الملل والروتين اصبحوا سمة الحياة اليومين اللي فاتوا وممكن اليومين اللي بعدهم.

تقولي لا دي الحياة فللي وبقى لونها بمبي اقولك تعالى نحسبها بالورقة والقلم (لو مفيش مش مشكلة):-

أولا:- على الصعيد الإعلامي

اكيد سمعتوا مش عارف مين كده يتحدى الملل وهو اصلاً يجيب الشلل.

ده طبعاً غير الأستاذ مش هتقدر تغمض عنيك ود طبعا روتين الغرض منه توفير الطاقة وخصوصا ان احنا داخلين على ازمة.

و الباشا عدنا الواحد بيبقى قاعد مستني الفرج مفيش مرة قالوا عدنا و مجوش انا عايش على أمل انهم مرة ميجوش.

ثانياً:- على الصعيد الشخصي

وقبل ما نقول ممكن الكلام ده ميكنش بيحصل معاك بس هو بيحصل معايا انا وكتير من صحابي

لما اكون عايز مثلاً فلان الفلاني اه لو الصبح نايم باليل على القهوة العصر في بيتهم هيروح فين يعني.

تقابل واحد صاحبك تقله لا جديد تحت الشمس يقولك ولا تحت القمر وحياتك ده كل لما اشوفه.

ثالثا :- على صعيد المؤسسات الحكومية

ارتبطت صورة الموظف عندنا بإنه عرقان ماسك بطيخة وجرنال وأصبحت الصورة دي دليل لإي موظف مثالي تقلي لا الموضوع ده انقرض خلاص اقولك لأ اسمحلي ده انا لسه من كام يوم شايف واحد بس كان مستخبي في حيطة مش جنبها لا و كسر البطيخة على سلم بيتهم كمان.

رابعا :- في السياسة

قولي امته سمعت خبر كده حسيت انه شدك كده كل يوم زي اللي قبله فلان راح وفلان لسه مجاش مرسي هيتجوز لا ميتجوزش

اوعدني يا رب بنشرة اخبار تكون من تقديمي ان شاء الله حتى خمس دقائق وانا هخليها مسخرة.

خامسا :- على صعيد الأمثال الشعبية

في امثال كده تحس انك عايز تشد في شعرك من الملل وانت بتقرأها ودي عينة بسيطة مش عايز حد يموت بالسكتة القلبية عندي هنا

اقلب القدرة على فمها تطلع البنت......... يعني مفيش فايده الموضوع ده ساري مع الحلل برضه.

اخبار البلد مع مين ؟ مع العمي والمكسحين.

اديني النهاردة صوف وخد بكرة خروف.

إذا غضب الله على قوم اسكنهم بنها و شبين الكوم (أجدع ناس)...مع احترامي الشديد انا اعرف ناس من هناك وزي الفل.

اركب المطية يا عطية.

اشتم ستك تعزك.... ازاي محدش يسألني!!

اصطلحت المقشة و يا البلاعة و الاتنين بقوا جماعة.

اللى انضرب الكف يستحمل الألف.

دماغ من غير كيف تستاهل سيف.أحلى صباح لتجار الجملة والتجزئة.

--------------------------------------------

بس أكيد ان ده كسل الي عايز حاجة يعملها يلاقي بدل الحاجة ألف...ولا ايه رأيكم؟؟

***الواجبات أكثر من الأوقات***

القـناعة...كنز لا يفنى

انا (والعياذ بالله من انا) مش عارف ايه حكاية عدم التفآئل اللي ماسكة شباب البلد الأيام دي تكلم واحد يقولك كيت وكيت وفلان وعلان

تقله بص لنصف الكوباية المليان يقولك هيا فين الكوباية دي أصلا

تقله قول الحمد لله يقولك الحمد لله بس دا ميرضيش ربنا أبدا

تقله فكر في بكرة يقولك يا مين يعيش لبكرة

تقله بكرة ان شاء الله احسن يقلك احيني اليوم وامتني غداً
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
فكرت وفكرت وقلت لنفسي أنا لازم اقولهم على اللي فيها انطلاقاً (حلوة انطلاقاً دي ) من دوري كفرد في هذا المجتمع.

أولاً:-احنا احسن من غيرنا خد عندك يا سيدي

تلاقي فين في العالم مودة وحب وتلاحم بين فئات الشعب زي اللي في براميل الفسيخ يوه قصدي اتوبيسات النقل العام والخاص واللي يتشدد لهم.

تلاقي فين مياه فيها مكيفات طبيعية زي مصرف النيل يوه قصدي نهر النيل هما مش بيقولوا اللي يشرب من النيل لازم يرجعله الكيف بيذل بعيد عنكم.

تلاقي فين في الدنيا بلد فيها عزة نفس وشموخ وإباء زي بلدنا تلاقي الواحد مش لاقي ياكل وعمره ما يزعل اي حد منه.

تلاقي فين شعب زي الشعب ده حكمته المفضلة إذا كان الكلام من فضة فالسكوت من ذهب بعض الناس قصيرة النظر تقلك دي سلبية وتبلد في المشاعر ( جهلة اعذروهم ) .

تلاقي فين في الدنيا شعب عنده بيروقراطية ادنا دا احنا هنصدرها بره قريب ( حتى اسألوا شؤون الطلاب في اي حتة في بر مصر ) .

ثانياً :-حاجات ربنا معافينا منها خد برده عندك يا سيدي

الديموقراطية : وهما اللي عندهم ديموقراطية احسن مننا في ايه وعملوا بيها ايه ولا حاجة وهيا الديموقراطية منعت المافيا.

حرية الصحافة : ده قرار حكيم جدا انه ميكنش فيه حرية صحافة يعني اي اتنين متخانقين مع بعض يفتحوا جرنالين واحنا نتفرج.

حرية انشاء الأحزاب : اصل حصلت كام حركة كده كذا واحد يفتح حزب ياخد تمويل من الدولة الصبح مقفول وباليل فاتحينها قهوة معسل وخلافه . يعني الحكومة تضمن منين بقى جدية الحزب ؟؟

المظاهرات: ودي ممنوعة زعلانين مش تعرفوا ليه وإذا عرف السبب بطل طبعا العجب . السبب ببساطة افرض في ناس نايمة تعبانة يعني الحق عليهم اللي بيحرصوا على راحة المواطنين . عايزين تعملوا مظاهرات اطلعوا على الصحراء بس اتأكدوا لحسن يكون في ثعبان مقيل أو عقرب مريح أو برص نايم.

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ

اعتقد بعد كده محدش يقدر يتكلم البلد زي الفل.(ما فيش حد يعرف يخلصلي عقد عمل بره ويكسب في البشرية كلها ثواب)

والله...زمان

الضحك من القلب ( بجد يعني ) أصبح عملة نادرة جداً في الزمن ده.
نادراً لما تلاقي حاجة تخليك تضحك بجد بس أكيد في حاجات بتضحكنا بجد من قلبنا.
ـــــــــــــــــــــــــــــــــــــــــــــــــــــــ

أنا أعرف واحد صاحبي كان لما يحب يضحك بجد يتصل بالحاج عباس يوصيه على 2 كيلو زغازيغ ويضربهم على الريق بدون فطار وينام ويصحى تمام ازاي معرفش.

* * * *
المهم أنا حبيت اعرف الموضوع رحت لصاحبي وسألته ايه النظام قال لي تعالى لما اعرفك على الحاج عباس وتجيبلك نص كيلو زغازيغ على قد فلوسك.قلت له على بركة الله.
* * * *

دخلنا على الحاج عباس راجل زي السكرة و الكلام معاه يفتح النفس ويخليك تشتري زغازيغ.
المهم الراجل عمل معانا الواجب وزيادة وبعدين بص اوي لصاحبي وقاله خير قاله ابدا انا عايز 2 كيلو ونص زغازيغ
قاله طيب 2 وعارفينها ليه النص قاله علشان صاحبي ( أنا يعني ) برضه بص لي اوي وقاله اوك يا بوب.
دقيقة و لقينا الزغازيغ موجودة. قلت لصاحبي خد النص بتاعي انا مفيش أمل فيا.
* * * *

انا كنت نسيت الموضوع لغاية لما صاحبي كلمني وقالي اسكت مش كيلو الزغازيغ غلي ومش موجود كمان.
نزلت الشارع وسألت لقيت الحاج عباس لم كل الزغازيغ من البلد.
الظاهر ان انا حسسته بأهمية الزغازيغ في البلد.
رحت ليه وقلت له ايه الي حصل ده يا حاج. قالي اصل انا نويت اغير اسمي قلت له يبقى ايه يعني؟
قالي يبقى الحاج عباس أبو العز.
قلت له إذا كان كده ماشي.

ــــــــــــــــــــــــــــــــــــــــــــــــــــــ
يا ترى احنا محتاجين حاجة تخلينا نضحك
ولا محتاجين نفوسنا تصفى علشان نعرف نشوف كل حاجة حلوة.
بس الأكيد ان سعادة الإنسان بيديه وبين يديه.

ـــــــــــــــــ

الزغـازيـغ دي مـش مـمـنـوعـات.